- Viva la grammatica!
-
Cun raschun cumpareglia Frédéric Mermoud il kino cun ina lingua u ina melodia. Sco quai che pleds furman frasas, passaschas, chapitels e la finala cudeschs, furman scenas e sequenzas in film. Cun ordinar quellas tenor la successiun giavischada durant la montascha nascha in'istorgia, sco quai ch'ina melodia nascha cun agid da notas e da la lunghezza da quellas.
Sco mintga lingua sa basa damai er il kino sin ina grammatica ch'ils cineasts formuleschan e sviluppan vinavant dapi ses origins. Els na filmeschan betg tenor il princip da la casualitad. Els sviluppan lur istorgia cun dar ad ella ina structura e cun s'imaginar co ch'els la vulan inscenar. Avant che las lavurs da filmar vegnan prendidas per mauns dovri damai ina gronda preparaziun. Quella cumpiglia ils suandants pass: scriver il scenari, elavurar il cudesch da scenas cun las sequenzas, las scenas e las quadraschas. Quai ves'ins bain en la sequenza suandanta dal film «Lost in La Mancha» (Gronda Britannia, 2002) da Keith Fulton e Louis Pepe, in film documentar davart las preparativas e las lavurs da filmar d'in film ch'il reschissur Terry Gilliam n'ha betg pudì terminar.
Tgi ch'enconuscha la lingua dal kino dispona d'in med impurtant per decodar ils films. Savens è l'istorgia dentant uschè captivanta che las aspectaturas ed ils aspectaturs na fan betg stim co ch'el è concepì. Tscherts elements da questa grammatica èn schizunt bunamain invisibels. Quai vala surtut per passadis filmics che mo in egl scolà po vesair. Quests passadis gidan a colliar las quadraschas, uschia che l'istorgia daventa credibla, ed a crear cuntinuitad.
La suandanta sequenza dal film «Der kleine Ausreisser» (USA, 1953) da Morris Engel e Ray Ashley cuntegna plirs elements da la lingua dal film ch'èn essenzials per il film e che procuran che quel raquintia in'istorgia: la posiziun da la camera, il retagl dal maletg che definescha ils limits dal maletg, las grondezzas da las quadraschas, la montaschas e natiralmain ils passadis d'egliada, dals quals i dat plirs. In da quels ans dat in'infurmaziun impurtanta per chapir la scena e la dischillusiun da noss giuven erox.
Il motiv, per il qual il reschissur è sa decidì da filmar la scena sin l'autezza da l'uffant, è quel ch'el vul s'avischinar il pli fitg pussaivel a la vista da ses protagonist. Cun mussar a nus l'emprim co ch'il mattatsch vul bittar ina balla sin ina piramida da buttiglias ed ans preschentar suenter il maletg da la piramida da buttiglias anc intacta, creescha el in passadi d'egliada ch'ans fa chapir ch'el ha bittà dasperas. Senza quest segund maletg na pudessan las aspectaturas ed ils aspectaturs betg chapir l'egliada consternada dal mattatsch.
- L'effect K incredibel
-
En l'emprima scena dal film «Mitgegangen, mitgehangen», la pitschna lecziun da kino da Frédéric Mermoud deditgada al passadi d'egliada, descriva la figura dad Alice fitg bain la funcziun da questa tecnica: pir cura che las aspectaturas ed ils aspectaturs scuvran quai che la protagonista vesa (in suenter l'auter: dultscharias, ina columba morta ed in bel giuven), chapeschan els tge che Alice resenta.
La scena fa diever da l'enconuschent «effect K» u «effect da Kuleschow», in effect da tagl ch'il teoreticher e reschissur sovietic Lew Kuleschow ha empruvà ora l'entschatta dals onns 1920 cun il public. La finamira da l'experiment è d'analisar co che l'expressiun da la fatscha da l'actur Iwan Mosjukhin sa mida tut tenor sin tge ch'el para da guardar. Lain empruvar ina giada…
Tenor la legenda hajan las aspectaturas ed ils aspectaturs ludà il talent da l'actur Mosjukhin, vesend mo il taglier schuppa, la mattatscha en il vaschè e la giuvna pusada sin il divan, ed els hajan interpretà intuitivamain sia expressiun da la fatscha sco quella da fom, tristezza e desideri.
L'effect da Kuleschow mussa dus aspects impurtants. Primo: las quadraschas sulettas na creeschan anc nagin senn, mabain pir lur colliaziun cun agid da la montascha. Segundo: la montascha ha in'influenza decisiva sin l'effect dals acturs. L'actur che demonstrescha l'effect da Kuleschow, na gioga numnadamain gnanc. Sulettamain il fatg che sia fatscha vegn colliada cun differents maletgs ans dat l'impressiun d'ina midada d'emoziuns.
Il passadi d'egliada ha damai in'influenza decisiva sin il gieu da l'actur che na stuess teoreticamain gnanc giugar in'emoziun, cunquai che la colliaziun tranter sia fatscha ed il taglier schuppa tanscha gia per exprimer sia fom.
- In vehichel per emoziuns e raquints
-
La tecnica dal passadi d'egliada na po betg mo svegliar sentiments sco desideri u tensiun, mabain era dar infurmaziuns impurtantas davart l'istorgia che sa sviluppa davant noss egls. Questas differentas funcziuns ha Alfred Hitchcock duvrà a moda cumplessiva en sia capodovra «Das Fenster zum Hof» (USA, 1954). Il film raquinta l'istorgia d'in um che passenta ses dis da reconvalescenza – pervi d'ina chomma en gip – cun observar ses vischins tras la fanestra da sia abitaziun. Tge ans mussan las midadas da quadrascha en la suandanta sequenza?
Cun midar tranter las quadraschas sin l'actur e sin quai ch'el vesa chapin nus ils motivs per ses divertiment, sias mirveglias e sia surpraisa. Quests passadis d'egliada èn damai indispensabels per chapir sias reacziuns. Els giogan dentant er ina rolla simbolica, cunquai ch'els fan da nus cumplizis da ses voyeurissem, gist en il mument, cura ch'el prenda in teleobjectiv per observar ses vischins anc pli datiers.
La camera na sa cuntenta betg pli da mussar a nus quai che la persuna vesa, mabain ella s'unescha cun si'egliada. Perquai na discurr'ins qua betg pli d'in passadi d'egliada, mabain d'ina subjectiva. Ina tala quadrascha dovra Mike Nichols cun finezza ed umor en il film «Die Reifeprüfung» (USA, 1967), l'istorgia da Benjamin Braddock, in giuven che ha gist terminà il college.
Cun restrenscher l'egliada da las aspectaturas e dals aspectaturs sin quai che Benjamin vesa tras sia mascra da sfunsar, rinforza la camera il sentiment da solitariadad da l'um giuven che sa senta ester en il mund da ses geniturs ed en il futur ch'els han planisà per el.
- Tut è ina dumonda dal passadi
-
Era sch'ils passadis d'egliada èn colliads fermamain cun il sentiment d'ina figura, pon ins era cun autras metodas colliar las quadraschas uschia che l'istorgia cula ed è natirala e che las aspectaturas ed ils aspectaturs emblidan tranteren ch'els guardan in film. Quests passadis gidan a concepir a moda pli vardaivla e persvadenta il spazi, nua che l'istorgia gioga; la finala correspunda quel gea en realitad darar a quel en il studio…
Sco quai che mussa la sequenza dal film «Kindergesichter» (Frantscha, 1923) da Jacques Feyder è il passadi vegnì pratitgà gia fitg baud en l'istorgia dal kino. Cun questa tecnica reusseschi da colliar in interiur filmà en in studio a Paris cun registraziuns fatgas al liber en la Val d'Anniviers en Svizra.
Sche nus discurrin cun insatgi, alura faschain nus quai per il solit da fatscha a fatscha. Per mussar quai sin il monitur dovran ils cineasts savens la tecnica da champ-cunterchamp.
Il champ è quai che la camera «vesa», damai il spazi filmà. Il champ oppost numn'ins il cunterchamp: sch'in reschissur filmescha damai ina scena da dialog en champ-cunterchamp, mussa el l'emprim ina figura che discurra e silsuenter mussa el, en cunterchamp, ses partenari da discussiun.
Per ch'in dialog mussà en la tecnica da champ-cunterchamp saja credibel, sto el svegliar l'impressiun che las figuras guardian ina sin l'autra. Per cuntanscher quai ston ins resguardar la famusa regla da 180 grads: ins tira ina lingia guliva imaginara tranter ils dus partenaris da discussiun. Per filmar il champ vegn la camera posiziunada d'ina vart da questa lingia imaginara. Per filmar il cunterchamp STO la camera restar da la medema vart da questa lingia. Uschiglio n'avessan las aspectaturas ed ils aspectaturs betg l'impressiun che las figuras guardian ina sin l'autra.
Bunamain tut las scenas da dialog èn construidas tenor quest princip, sco quai ch'illustrescha questa sequenza or dal film «Zauberer von Oz» (USA, 1939) da Victor Fleming.
En questa sequenza ves'ins fitg bain che la camera resta adina da la medema vart da la lingia imaginara, era sch'ella siglia adina puspè vi e nà tranter la stria che sa chatta da vart dretga, e Dorothy cun ses amis, che sa chattan da vart sanestra. La tecnica dal champ-cunterchamp è damai vegnida applitgada qua correctamain.
En questa sequenza dal film «Take Shelter – Ein Sturm zieht auf» (USA, 2011) da Jeff Nichols capita al tschiel in eveniment inquietant. La tensiun crescha surtut tras la moda e maniera co ch'il reschissur fa il passadi en l'axa.
L'emprim vegnan las figuras mussadas da davanten, en vista approximada. Grazia ad in passadi d'egliada sin ina rotscha utschels siglia la camera tuttenina davos las figuras sin l'axa da la via. A partir da quest mument vegn l'entira scena mussada davent da questa axa, sco sche la camera sa muventass vi e nà sin ella. Uschia po la camera s'approximar e s'allontanar da domaduas varts da las persunas. Il passadi d'egliada ha damai per consequenza ina successiun da quadraschas pli approximadas e pli allontanadas che intermedieschan in grond effect da schoc e che accentueschan la mimica desperada dal bab.
Cun il passadi da moviment pon ins dar l'impressiun ch'in moviment giaja d'ina quadrascha en l'autra, sco che mussa la suandanta sequenza or da «Die Nacht ist jung» (Frantscha, 1986) da Leos Carax.
L'um giuven va l'emprim a sanestra or dal maletg. En la quadrascha sequenta vegn el da dretga en il maletg. Quest passadi da moviment dat il sentiment d'in spazi coerent. Lura cumenza la figura ad ir a pe. A l'entschatta vegn il moviment filmà sco sequenza cuntinuanta. Suenter vegnan pliras quadraschas colliadas ina cun l'autra cun zuppentar las registraziuns da l'actur ed en spezial da sias parts dal corp uschè bain sco pussaivel. Cun colliar ils moviments en questas differentas quadraschas survegnan las aspectaturas ed ils aspectaturs l'impressiun ch'il percurs saja vegnì filmà en ina giada. En realitad han ins filmà la scena en plirs takes e lura als collià cun blera lavur.
Ventgasis onns pli tard citescha il reschissur Noah Baumbach en ses film «Frances Ha» (USA, 2012) questa scena daventada entant cult. El prenda però intginas libertads. Tgeninas?
Per l'ina filmescha il reschissur il percurs da sia protagonista en la direcziun cuntraria. Per l'autra na mussa el il percurs betg a moda cuntinuanta cun agid da passadis da moviment, mabain lavura cun «jump cuts», tagls dirs. Intginas secundas d'ina scena vegnan tagliadas ora, uschia ch'i dat in sigl tranter duas quadraschas.
Il jump cut cuntrafa a las reglas classicas da la montascha e po vegnir utilisà intenziunadamain sco passadi sbaglià. Il reschissur franzos Louis Malle ha fatg da quai sia spezialitad. Tge pon ins dir dals passadis en questa scena or da «Zazie in der Metro» (Frantscha, 1960)?
Zazie sa chatta tuttenina a dretga da ses aug, era sch'ella duess seser a sanestra dad el. Las mangiativas mancan tuttenina sin ils plats, la gidantra da tegnairchasa svanescha or dal maletg. Louis Malle ha inserì sapientivamain plirs passadis sbagliads, sigls d'axa, ellipsas e jump cuts per cundir ses film cun absurditad e comica.
- Sbagls da film
-
Entant ch'ils passadis sbagliads da Louis Malle èn vegnids inserids intenziunadamain, datti senz'auter «vairs» passadis sbagliads ch'èn tut auter che intenziunads ed uschia «sbagls da film» per propi. Quai po capitar a tut ils cineasts. La finala vegnan las scenas d'in film savens filmadas en successiun totalmain differenta e mintgatant era cun distanzas da pliras emnas. Sco script supervisor vali perquai d'observar tut ils detagls da la quadrascha (accessoris, costums, illuminaziun, posiziun dals acturs, euv.) per garantir la cuntinuitad da las quadraschas durant tut las registraziuns.
Sch'ins vesa en in film in passadi sbaglià nunintenziunà, lura ha il script supervisor probablamain manchentà quest detagl, per exempel sco en questa scena or da «Pretty Woman» (USA, 1990) da Garry Marshall cun ina legra transfurmaziun.
Las figuras giugadas da Julia Roberts e Richard Gere s'emprendan gist d'enconuscher in pau meglier durant l'ensolver filmà cun la tecnica da champ-cunterchamp, cura ch'il cornet en il maun da Julia Roberts sa transfurma tuttenina en in pancake!
In passadi sbaglià? Precis! E sche nus essan gist londervi, qua anc in exempel or dal film «Fluch der Karibik» (USA, 2003) da Gore Verbinski.
Per chattar quest passadi sbaglià dovri in bun egl! Il pirat Jack Sparrow sa prepara cun il pe dretg per ir giu da la bartga … e passa cun il pe sanester sin la puntina! In tal sbagl dat en egl per il solit pir cun tagliar, cura ch'igl è gia memia tard per anc ina giada filmar la scena.
- Davart Frédéric Mermoud
-
Il reschissur Frédéric Mermoud, naschì il 1969 a Sion, ha l'emprim fatg plirs films curts. La plipart da quels è vegnida premiada. Il 2009 ha el filmà ses emprim film lung «Komplizen», in thriller, nua che dus inspecturs da polizia emprovan da sclerir la mort d'in giuvenil. Era ses segund film dramatic «Moka» (2016) pon ins attribuir a quest gener. El raquinta l'istorgia d'ina mamma che vul chattar in rowdy da traffic ch'ella fa responsabel per la mort da ses figl.
En pli ha Frédéric Mermoud filmà per Canal+ las segundas staflas da las serias «The Returned» ed «Engrenages».
Grazia a sia experientscha professiunala na capitan a quest cineast che ama il film da gener e che gioga cun la lingua dal film betg pli uschè blers passadis sbagliads!
