- La vaira partenza da la Titanic
-
En il kino datti duas categorias essenzialas: il film documentar ed il film dramatic.
Ils films documentars vulan preschentar il mund co ch'el è e mussan protagonists reals. Ils films dramatics percunter raquintan cun agid d'acturas e d'acturs istorgias inventadas u sviluppadas a basa d'eveniments reals.
En las duas suandantas sequenzas da film ves'ins la partenza da la Titanic, il bastiment a vapur ch'è sfundrà durant la traversada da l'Atlantic e ch'è tras quai restà en l'entir mund en trista memoria … Mo ina sequenza deriva d'in film documentar, tgenina?
Ils maletgs da l'emprima sequenza derivan dal film «Die Abfahrt der Titanic» (Gronda Britannia, 1912). Els mussan la partenza da la vaira Titanic ils 10 d'avrigl 1912 or dal port britannic da Southampton. Il bastiment a vapur transatlantic è vegnì filmà il di da sia partenza en temp real: i sa tracta d'in film documentar.
La segunda sequenza dal film «Titanic» (USA, 1997) da James Cameron reconstruescha la partenza dal bastiment cun agid d'acturas e d'acturs, d'effects spezials e d'ina sequenza da tagls raffinada che reparta la scena en pliras quadraschas (ils passagiers sin la punt, il pievel sin ils mirs dal port, las elicas dal bastiment sut l'aua, etc.): i sa tracta pia d'in film dramatic.
Quests dus exempels laschan supponer ch'i saja simpel da differenziar in film documentar d'in film dramatic. Co che las duas suandantas sequenzas mussan, n'è quai dentant betg adina il cas…
En l'emprima sequenza da «Black Swan» (USA, 2011) filmescha il reschissur Darren Aronofsky acturs professiunals sco Natalie Portman e Vincent Cassel. Il fatg ch'els èn stars lascha supponer ch'i sa tracta d'in film dramatic. In ulteriur indizi: a basa da la successiun da tagls pon ins partir dal fatg che questa scena è vegnida filmada pliras giadas e ch'ils acturs han repetì ils dialogs ed èn vegnids filmads or da differentas perspectivas. Era sch'el para fitg realistic, sa tracti tuttina d'in film dramatic.
En la segunda sequenza dal film «L'Opéra de Paris» (Frantscha, 2017) da Jean-Stéphane Bron na ves'ins naginas acturas e nagins acturs, mabain sautunzas e sautunzs durant la prova ch'il reschissur ha filmà en temp real per als mussar durant la lavur. I sa tracta d'in film documentar.
Co che questas duas sequenzas cumprovan n'èsi betg adina simpel da differenziar in film dramatic d'in film documentar. Mintgatant è in film dramatic uschè realistic ch'ins pudess crair ch'i sa tractia d'in film documentar. E tuttina sco in film dramatic raquinta er il film documentar in'istorgia, che n'è però betg inventada.
En in film dramatic sa schluitan acturas ed acturs professiunals en ina rolla. Ils protagonists en films documentars percunter sa preschentan davant la camera sco en la vita reala.
Jean-Stéphane Bron declera questa differenza uschia: «Cura ch'in film documentar è terminà, mainan ils protagonists simplamain vinavant lur vita; cura ch'in film dramatic è però terminà, è la rolla da las acturas e dals acturs a fin.»
Ils passagiers sventiraivels ch'ins ha pudì vesair en l'emprima sequenza dal film sin la Titanic èn damai silsuenter propi ids cun il bastiment sur l'Atlantic; las acturas ed ils acturs en il film «Titanic» da James Cameron percunter han giugà en las culissas dal studio ed èn turnads a chasa suenter la lavur. Las sautunzas ed ils sautunzs en «L'Opéra de Paris» han suenter il film lavurà vinavant sco sautunzas e sautunzs entant che las acturas ed ils acturs en «Black Swan» han surpiglià silsuenter autras rollas en auters films.
- L'emprim film documentar
-
En in film documentar vul il reschissur u la reschissura mussar la realitad d'in tema specific. Ins na dastga dentant betg emblidar ch'in film è adina inscenà. Cun fixar la posiziun da la camera, il retagl dal maletg, etc. decida il reschissur u la reschissura tge che vegn filmà e co che la scena vegn organisada: el u ella inscenescha pia.
Inscenar è ina pratica usitada gia dapi las entschattas dal kino e l'invenziun dal cinematograf l'onn 1895 tras ils frars Auguste e Louis Lumière, che han fatg ils emprims films.
En lur emprima ovra «Arbeiter verlassen die Lumière-Werke» (Frantscha, 1895) han ils frars Lumière filmà trais giadas co che las lavurantas ed ils lavurants bandunan l'areal da fabrica da la famiglia a Lyon. Pertge han els filmà questa scena pliras giadas, e pertge han els mussà a la publicitad la terza versiun?
Sch'ils frars Lumière han filmà trais versiuns en successiun, lura senza dubi perquai che las emprimas duas als parevan memia caoticas. Pir la terza versiun correspundeva il plitgunsch al maletg ch'els vulevan intermediar da lur fabrica e da lur persunal: ordinà, disciplinà ed uschia pli positiv.
Ultra da quai han ils frars Lumière procurà che la terza versiun raquintia ina pitschna istorgia: a l'entschatta dal film s'avran las portas ed a la fin sa serran ellas puspè. En pli han els dirigì lur lavurantas e lavurants cun dar instrucziuns ad els, damai betg bler auter ch'ils cineasts da pli tard. Cun far quest pitschen film, che ha scrit istorgia sco emprim film documentar, a basa d'ina perspectiva, han ils frars Lumière damai inscenà lur film.
- In eskimo in zichel retardà
-
«Nanuk, der Eskimo» (USA, 1922) vala sco in dals emprims films documentars lungs insumma. Robert J. Flaherty, in prospectur e cartograf american, ha realisà el durant sias expediziuns en las regiuns arcticas da l'America dal Nord, il spazi da viver dals Inuits.
Il reschissur ha supplitgà ils Inuits da represchentar davant la camera scenas tipicas da lur tradiziuns ed isanzas, las qualas n'existivan dentant en questa furma per gronda part gia betg pli. Uschia han els per exempel stuì ir a chatscha cun l'arpuna, schebain ch'els duvravan gia schluppets. Flaherty ha damai mess en scena ils Inuits cun dar ad els instrucziuns sco quai ch'ils frars Lumière avevan gia fatg avant el cun lur lavurantas e lavurants.
Sco quai ch'ins vesa en questa scena ha Flaherty schizunt duvrà trics sco maletgs statics, che vegnivan duvrads savens a l'entschatta da l'èra dal kino. Per preschentar l'emprim in suenter l'auter ses protagonists, ha il reschissur simplamain tschentà giu la camera entant ch'els èn entrads en il cajac. Tge pensava il public lezza giada da quai? Crajevan las aspectaturas ed ils aspectaturs propi che tantas persunas hajan plaz en in cajac?
Robert Flaherty era da l'opiniun ch'ils Inuits eran pli originars ed autentics avant ch'els èn s'inscuntrads cun ils alvs. Per mussar sia perspectiva sco cineast ha el laschà reviver lur veglias tradiziuns.
La finala exprima in film documentar adina l'optica da ses reschissur u da sia reschissura. Perquai lascha era Jean-Stéphane Bron qua e là reconstruir ina scena e repeter ses protagonists frasas per ch'il resultat correspundia meglier a sia optica.
En ses film documentar «Cleveland versus Wall Street» (Frantscha, 2010) va Bron anc pli lunsch ed inscenescha in process ch'i n'ha mai dà. Il 2008 ha la citad americana da Cleveland purtà plant cunter 21 bancas da la Wall Street. Ella ha inculpà las bancas d'avair bittà numerusas famiglias or da lur chasas, perquai ch'ellas na pudevan betg pli pajar lur debits.
Bron è sa rendì a Cleveland per filmar il process cunter las bancas. Ma en il fratemp era il process vegnì sistì. Per far bun questa ingiustia e dar als protagonists l'occasiun d'explitgar lur vista da la situaziun, ha il reschissur reconstruì il process cun quels che avessan gì da participar a quel.
Era sch'i n'ha mai dà quest process uschia, sa basa il film tuttina sin fatgs e protagonists che descrivan quai ch'è capità. Ma pon ins anc discurrer d'in film documentar, sch'in cineast vul reconstruir cumplettamain la realitad? Malgrà quai cumprovan quests dus exempels l'impurtanza da l'inscenaziun, da l'optica e da las decisiuns ch'ina reschissura u in reschissur prenda per far in film documentar.
- L'ethos vegn crititgà
-
Reschissurs da films documentars ston resguardar in tschert ethos, damai respectar intgins princips, sch'els vulan restar fidaivels a la realitad ch'els vulan reconstruir. Els na dastgan betg tradir lur protagonists u raquintar manzegnas cun ils maletgs.
Jean-Stéphane Bron na fa per exempel naginas dumondas a ses protagonists, las qualas pudessan violar lur integritad, ed el n'als inscenescha era betg en ina furma che sfalsifitgass la realitad. Cun auters pleds: l'ethos dal film documentar pretenda che la realitad vegnia represchentada cun garantir tant sco pussaivel la vardad da las persunas e dals eveniments filmads.
Ha il reschissur Pascal Plisson resguardà en la sequenza dal film documentar «Auf dem Weg zur Schule» (Frantscha, 2013) l'ethos dal film documentar descrit sura?
La resposta è cleramain: na! Per far crair il public ch'ils uffants vegnian chatschads d'in triep elefants, ha il cineast dramatisà cun intenziun la scena. Igl è evident che Plisson ha ditg als dus uffants da currer sco sch'ils elefants als persequitassan – quai che n'era dentant betg il cas. Cun laschar resunar ils suns trumbettants dals elefants ed accentuar quels cun musica dramatica, sveglia el dentant quest'impressiun. Questa manipulaziun lascha supponer ina realitad che n'ha betg existì il mument ch'il film è vegnì fatg. Da dar da crair al public talas chaussas cunterfa a l'ethos dal film documentar, era sch'ils uffants èn en il passà effectivamain vegnids persequitads ina u l'autra giada dad elefants. In reschissur che ha interiurisà quest ethos avess plitost laschà rapportar ils uffants da quest «inscunter» cun ils elefants.
Per fortuna na proceda la maioritad dals reschissurs da films documentars betg uschia. Nicolas Philibert per exempel n'intervegn insumma betg durant ch'el filmescha ed el na commentescha era nagut. Quai daventa evident en la suandanta sequenza dal film «Sein und Haben» (Frantscha, 2002). Qua lascha el sfundrar nus en l'instrucziun d'ina scola dal vitg, nua che uffants da differents stgalims vegnan instruids communablamain.
Grazia a questa metoda sveglia il film l'impressiun che la represchentaziun da la realitad correspundia a quai che succeda en la classa. Per garantir il sentiment dal «sfundrar» vegn filmà cun in pitschen team e cun uschè pauc material sco pussaivel, e durant il filmar na vegn betg intervegnì per disturbar uschè pauc sco pussaivel ils protagonists. Tuttina na dastg'ins betg emblidar ch'ils cineasts e las cineastas mussan adina lur atgna perspectiva. En quest cas capita quai plitost durant la montascha cun sa decider per ina tscherta scena e cunter in'autra.
Questa avischinaziun deriva dal Direct Cinema, ina furma dal film documentar sviluppada la fin dals onns 1950 en l'USA. Quella è ida a pèr cun l'introducziun da cameras da spatla levas, grazia a las qualas las cineastas ed ils cineasts èn daventads pli mobils e flexibels. Da quest temp deriva in'ulteriura innovaziun impurtanta, numnadamain la pussaivladad da registrar il tun ed il maletg il medem mument, quai era grazia ad apparats da registraziun fitg levs. Uschia pudev'ins filmar live ed esser fitg datiers dals eveniments.
Pioniers dal Direct Cinema, ch'i dat era sco varianta «Cinéma vérité», èn ils reschissurs David ed Albert Maysles che han accumpagnà en «Gimme Shelter» (USA, 1970) la turnea dals Rolling Stones tras l'America, senza gnanc ina giada n'intervegnir en l'acziun…
La sadada è effectivamain succedida, ed ils dus reschissurs èn sa tegnids ora, sco quai che lur avischinaziun documentara prescriveva. Per intginas persunas dal fatg èn Direct Cinema e Cinéma vérité in'utopia totala. A lur avis sa cumportan umans auter, uschespert ch'els san ch'els vegnan filmads. Per ch'ils umans sa cumportian a moda pli natirala, als stuess ins atgnamain filmar zuppadamain. Ma ina tala pratica cuntrafaschess a l'ethos dal film documentar.
Jean-Stéphane Bron tgira durant ch'el filmescha in ethos dal tuttafatg different ch'il Direct Cinema. El na percepescha sasez betg sco observader neutral ed intervegn perquai gugent en l'acziun. Per l'inscenaziun da films documentars datti damai pliras variantas, tut tenor l'ethos e l'avischinaziun ch'ins represchenta. Ma il princip suprem è adina quel da restar uschè datiers da la realitad sco pussaivel.
Stéphane Bron declera questa pretensiun ed explitgescha ch'ins po dumandar ils protagonists tut tge ch'ins vul uschè ditg ch'ins na tradescha betg il tema dal film e las persunas dumandadas, damai la vardad. Sch'ina intervenziun maina dentant a maletgs sfalsifitgads, èsi meglier da la tralaschar.
Intginas reschissuras ed intgins reschissurs da films documentars intervegnan savens en films e sa mettan magari era sezs en scena per cuntanscher ina tscherta finamira. Quai fa per exempel il reschissur american Michael Moore.
En «Bowling for Columbine» (USA, 2002) dumonda el l'actur Charlton Heston, che defenda il dretg da posseder armas, pertge ch'el veglia tegnair in referat davart ils «avantatgs da las armas» en ina citad, nua ch'ina matta saja vegnida schluppettada paucs dis avant.
Sco quai ch'ins po vesair en questa sequenza proceda Michael Moore auter che Jean-Stéphane Bron: el interroghescha cun stinanza ses protagonists per als far vegnir malsegirs e scuvrir lur cuntradicziuns.
Il cineast vul damai cuntanscher ch'il public surpiglia ses agen punct da vista. En quest cas vul el mussar che la vendita libra dad armas da fieu en l'USA è in dals motivs ils pli impurtants per il dumber enorm da mortoris. Uschè gists sco ses arguments pon er esser: il film è plitost in film da propaganda ch'in film documentar.
- Jean-Stéphane Bron – davart la persuna
-
Jean-Stéphane Bron è daventà enconuschent cun ses film «Mais im Bundeshuus» (2003) davart il mintgadi politic en il parlament svizzer. Sia carriera sco documentarist ha cumenzà il 1997 cun «Connu de nos services» davart l'affera da fischas, la surveglianza poliziala da las burgaisas e dals burgais.
Dapi lura ha Jean-Stéphane Bron realisà ina retscha da films documentars, tranter auter «La Bonne conduite» (1999) cun istorgias d'ina scola d'ir cun auto, «L'Expérience Blocher» (2013), in inscunter cun in politicher svizzer e sias opiniuns fixas, «Cleveland versus Wall Street» (2010) che atgisa cun agid d'in process fictiv vair las ingiustias dal sistem da finanzas u era «L'Opéra de Paris» (2017), che descriva il manaschi en questa instituziun culturala cumplitgada.
En tut ses films persequitescha Jean-Stéphane Bron in'avischinaziun determinada fermamain da l'ethos. La rigurusadad e la coerenza da ses kino fan dad el in dals megliers represchentants dal film documentar contemporan.
