- Sa metter en la situaziun d'ina figura
-
Sco actur ston ins pudair sa metter en la situaziun da figuras fictivas e las pudair represchentar vardaivlamain cun render perceptibels lur sentiments (u mintgatant era lur mancanza da sentiments). Perquai sto in'actura u in actur sa preparar sin quest gieu da rollas avant las lavurs da filmar. Ella u el na sto pia betg mo emprender a memoria il dialog ed exercitar la pronunzia, mabain era stgaffir la figura cun surpigliar ses caracter, cun sa patrunar da ses cumportament e da sias reacziuns, euv.
La sequenza che suonda deriva dal making-of da «Shining» (USA, 1980) da Stanley Kubrick. Ins vesa co che l'autur Jack Nicholson sa metta en la situaziun da sia figura, avant che vegn filmada ina scena-clav dal film.
Per sa metter en la rolla da quest um che vegn plaunsieu or da senn sa stgauda Jack Nicholson corporalmain e mentalmain – cun in'intensitad impressiunanta! El dovra la renumada metoda da l'Actors Studio sviluppada ils onns 1950. Tenor quella sa serv'ins da las emoziuns che derivan d'atgnas experientschas.
- In gieu che sa sviluppa
-
Dapi l'entschatta dal kino è l'art dramatic sa sviluppà cuntinuadamain. In actur en in film mit na sa muventa betg tuttina sco in actur dals onns 1940, tuttina sco quai ch'ina actura dals onns 1960 n'ha betg la medema moda da discurrer sco in star da film da l'onn 2010. Precis sco quai che la moda da far films è sa midada ensemen cun il svilup tecnic en il decurs da las differentas epocas, è era sa midada la moda da giugar.
Tge pon ins dir da la moda da giugar da l'actura Brigitte Helm en la sequenza che suonda? Ella deriva dal film «Metropolis» (Germania, 1927) da Fritz Lang, ina da las capodovras dal temp dal film mit.
La moda da giugar da l'actura, ses gests e la maniera co ch'ella fa egls gross èn fitg expressivs ed exagerads. Questa moda da giugar deriva dal teater, nua che moviments ed expressiuns ston esser pli che clers, per che era las aspectaturas ed ils aspectaturs en las pli davosas retschas possian suandar bain l'acziun. En ils films mits han las acturas ed ils acturs surpiglià questa moda da giugar per cumpensar la mancanza da dialogs e per simplifitgar al public la chapientscha. Pervi da la pitschna sensibilitad cunter la glisch dal film stuev'ins en pli accentuar lur mimica cun sminca expressiva, quai che lascha parair lur gieu in pau steri.
Las reschissuras ed ils reschissurs dals films mits han remartgà svelt ch'il kino porscha dapli pussaivladads da s'exprimer, sch'ins fa diever da la montascha e da differents formats dal maletg (gronda vista, vista approximada, totala, euv.). Cun auters pleds: cun demontar las scenas en pliras quadraschas ha il kino survegnì ina gronda forza expressiva. Perquai è il gieu da las acturas e dals acturs daventà pli e pli subtil.
En la sequenza che suonda or da «Singin' in the Rain» (USA, 1952) da Stanley Donen e Gene Kelly, mussà en ils kinos tudestgs cun il titel «Lass mich dein Glücksstern sein», sa dispitan las figuras, giugadas da Gene Kelly e Debbie Reynolds, pervia da l'art dramatic en il teater ed en il kino.
Entant che la dunna giuvna persunifitgada da Debbie Reynolds cumpareglia ils acturs da film cun simplas sumbrivas, beffegia l'um (Gene Kelly) ils acturs da teater cun caricar sias replicas, sia gestica e mimica. En il teater è il gieu pelvair pli expressiv che en il film. En il teater ha l'acziun lieu sin tribuna, ed era las aspectaturas ed ils aspectaturs en las pli davosas retschas ston pudair vesair ils gests e la mimica da las acturas e dals acturs.
En il kino è quai tut auter: la moda co ch'ina actura gioga dependa da la quadrascha, per exempel sch'ella vegn filmada en vista approximada u en ina totala. Perquai sto ella adattar sia moda da giugar a la resoluziun scenica, a l'inscenaziun. Sche l'actura sa per exempel che sia fatscha vegn filmada en ina vista approximada, lavura ella subtilamain cun sia mimica. Quai pon ins observar en la sequenza che suonda or dad «Opening Night» (USA, 1977) da John Cassavetes. Gena Rowlands persunifitgescha en quest film la rolla d'ina dunna, a la quala la mort d'ina giuvna admiratura na lascha nagin paus.
En cumparegliaziun gioga in actur che sa ch'el vegn filmà en ina totala, uschia ch'ils aspectaturs al vesan mo or d'ina tscherta distanza, a moda expressiva cun accentuar pli fitg ses gests e ses moviments.
Natiralmain ch'i dat anc autras differenzas tranter l'art dramatic en il teater ed en il film. L'actur da teater gioga il toc senza interrupziun. Sch'el na sa betg il text, na po el betg curreger sasez pli tard. In actur da film po cumenzar anc ina giada davent da l'entschatta, sch'el ha fatg in sbagl. Per il film dovri però gronda concentraziun, perquai che las scenas na vegnan per il solit betg filmadas en la dretga successiun. L'actur sto perquai enconuscher precisamain il script, per ch'el possia mintgamai giugar «endretg».
- Adina en moviment
-
La moda da giugar en il kino n'è sa sviluppada vinavant betg mo cun il temp, ella sa differenziescha er areguard las differentas tendenzas ed ils differents stils e geners dal film. A la fin dals onns 1950 lavuravan per exempel las reschissuras ed ils reschissurs dal stil franzos Nouvelle vague tenor ina metoda particulara ed els han fatg films che regurdavan ils aspectaturs ch'in film da kino è ina fabricaziun, ina creaziun d'art. Els pretendevan da lur acturas ed acturs da betg sa zuppar davos lur figura e da sa tegnair vi d'ina tscherta moda da discurrer, era cun il ristg da parair main natiral. Quai pon ins observar bain en la sequenza che suonda or da «Jules und Jim» (Frantscha, 1962) da François Truffaut. La mimica da l'actura vegn accentuada cun integrar maletgs fixs.
En questa sequenza discurra l'actura Jeanne Moreau a moda fitg energica e pauc natirala e regorda uschia ils aspectaturs ch'els guardian in film. Ils maletgs fixs suttastritgan quest effect.
La moda da giugar sa differenziescha er areguard ils geners dal film. En ina cumedia giogan ins auter che en in film d'orrur. Tge pon ins dir en la sequenza che suonda or da «Manche mögen's heiss» (USA, 1959) da Billy Wilder davart la moda da giugar da las acturas e dals acturs?
Ins vesa ch'ils acturs – che giogan en questa cumedia ensemen cun Marylin Monroe ils dus musicists travestgids sco dunnas – gesticuleschan bler e che lur mimica è vaira exprimida. Quai è savens il cas en cumedias che sa basan sin travestgidas e nua ch'i reussescha als umens mender che meglier da far crair d'esser dunnas. E sco en mintga cumedia ston ils acturs metter en il center cunzunt ils dialogs cun accentuar quels spezialmain.
La moda da giugar na sa differenziescha betg mo tenor il gener, ella è era sa sviluppada vinavant ensemen cun la tecnica da film. Ozendi è la gronda part dals blockbusters plaina cun effects spezials. Las acturas ed ils acturs lavuran davant in fund blau u verd, en il qual las graficas da computer da la scenaria, nua ch'els duessan en sasez giugar, vegnan incorporadas pli tard. Durant talas lavurs da filmar giogan las acturas ed ils acturs damai en in spazi vid, magari schizunt senza lur visavi. Els ston avair ina gronda forza imaginativa per pudair sa metter en la situaziun da lur figuras, sco quai che mussa la sequenza che suonda. En «Der Herr der Ringe: Die Gefährten» (Nova Zelanda, 2001) da Peter Jackson ha l'actur Ian McKellen giugà la scena davant in fund verd e sa chapescha senza la cumpagnia d'ina figura mitica.
Ian McKellen, che sa schluita qua en la rolla dal striun Gandalf, è stà fitg sceptic da cumbatter inimis imaginars davant in simpel fund verd. «Per insatge uschia na sun jau betg vegnì actur», ha el confessà ad in schurnalist ch'al ha intervistà davart il svilup da la professiun d'actur.
- Giugar ... ma co?
-
En la lavur d'in actur vai per exprimer sentiments sco plaschair, tema, speranza, fastidi u admiraziun. I dat oz duas metodas principalas da l'art dramatic. Cun la metoda da l'Actors Studio fa l'actur tras intensivamain ils sentiments da sia figura.
L'autra metoda sa basa sin ina reproducziun pli mecanica dals sentiments. Il mund emoziunal da las figuras vegn cunzunt transmess cun la montascha da las quadraschas e cun l'inscenaziun. Sco defensur da questa metoda (deducida da l'uschenumnà «effect K» ubain «effect da Kuleschow», in effect da montascha ch'il reschissur sovietic Lew Kuleschow ha descrit teoreticamain) ha pretendì per exempel Alfred Hitchcock da ses acturs da giugar a moda neutrala u schematica, sco quai ch'ins po observar en la sequenza che suonda or da ses film «Der unsichtbare Dritte» (USA, 1959).
En questa scena vegn la figura Roger Thornhill, giugada da l'actur american Cary Grant, accusada per sbagl d'avair commess in mazzament. Igl è plitost l'inscenaziun che sia moda da giugar fitg retegnida che lascha sentir l'aspectatur la tensiun e la confusiun da la figura.
La renumada metoda da l'Actors Studio sa basa sin ina tecnica da teater inventada dal Russ Constantin Stanislawski e lura adattada a las cundiziuns dal kino. In'entira generaziun da stars da film è vegnida scolada tenor questa metoda, tranter els James Dean, Steve McQueen, Marylin Monroe ed Elizabeth Taylor.
La metoda parta da l'idea ch'in actur na sto imitar nagut. Perquai ch'el è sez in uman, po el prender or da ses intern las emoziuns da sia figura. Quai mussa la sequenza che suonda or da «Wie ein wilder Stier» (USA, 1980) da Martin Scorsese, en la quala il boxist Jake LaMotta (giugà da Robert De Niro) sa chatta suenter intgins schabetgs disfortunads en praschun. Co pon ins descriver la moda da giugar da quest erox che ha pers la favur?
Robert De Niro gioga la scena intensivamain, a moda prest animalica, per mussar la gritta sfranada da Jake LaMotta. El sa serva da las emoziuns che derivan da sias atgnas regurdientschas fisicas e psichicas; senza dubi sa regorda el d'ina situaziun, nua ch'el sez è sa sentì tractà malgistamain.
L'influenza da l'Actors Studio sin l'art dramatic è stada uschè gronda che acturas ed acturs fan anc oz diever da tecnicas sumegliantas. Ursula Meier lavura cun ina metoda cumparegliabla per instruir sias acturas e ses acturs: ella spetga dad els ch'els dovrian lur regurdientschas mentalas e corporalas per persunifitgar lur rolla.
Era per quest motiv recurra ella magari ad acturs laics. Sch'ella dovra ina tscherta figura, per exempel in policist u in medi: tgi fiss adattà meglier ch'in vair policist u medi per surpigliar sia gestica, sia posiziun dal corp ed il vocabulari da sia professiun? La persuna tschernida sto però savair giugar, quai vul dir ch'ella sto esser abla da prender ils sentiments da sia figura or da sasezza per als pudair reproducir davant la camera. Per eruir sche la persuna sa giugar, dovri perquai in casting era per recrutar laics.
En il film dramatic «Die Klasse» (Frantscha, 2008) raquinta il reschissur Laurent Cantet dal mintgadi d'in scolast d'ina classa gimnasiala a Paris. Per pudair reproducir questa istorgia a moda uschè realistica sco pussaivel è il reschissur sa decidì da lavurar cun giuvnas acturas laicas e giuvens acturs laics. Paran els natirals?
Absolut! Ils giuvens acturs fan ina parita surprendentamain natirala. Lur rolla sco gimnasiastas e gimnasiasts giogan els perfetgamain. Els èn «reals», prest sasezs. Els s'expriman en lur atgna lingua, cun lur agens pleds e targlinan da respunder, quai che dat al film in effect fitg realistic. Perquai po in film dramatic daventar pli autentic cun lavurar cun laics.
Per il film datti damai duas modas da giugar principalas: u ch'il reschissur metta l'actur en il center e pretenda dad el da sa servir d'emoziuns che derivan d'atgnas regurdientschas, sco per exempel Ursula Meier, u ch'el pretenda ina moda da giugar neutrala e l'inscenaziun creescha prest l'entir effect, sco per exempel tar Alfred Hitchcock.
- Instruir acturas ed acturs
-
La reschissura instruescha in'actura durant las lavurs da filmar. Ella dat instrucziuns a l'actura co giugar sia figura. Quai numn'ins direcziun d'acturs. La moda co ch'ils reschissurs instrueschan ils acturs po esser fitg differenta. Tscherts dattan instrucziuns fitg exactas, auters laschan improvisar savens las acturas ed ils acturs.
Durant las lavurs da filmar sto l'actura sa famigliarisar cun ina figura, da la quala il reschissur ha savens in maletg fitg precis. Tut tenor la moda da la direcziun d'acturs po il gieu d'in actur sa differenziar d'in film a l'auter e cunzunt d'in reschissur a l'auter, sco quai che mussan a moda captivanta las sequenzas che suondan. En tuttas gioga il star da film american Johnny Depp.
L'emprima sequenza, or da «Gilbert Grape – Irgendwo in Iowa» (USA, 1993) da Lasse Hallström, mussa Johnny Depp en la rolla d'in um giuven che sto pertgirar ses frar impedì. Tge pon ins dir da sia moda da giugar?
Johnny Depp persunifitgescha qua ina persuna laconica e plitost introvertida ch'el gioga a moda precauta e retegnida. Intgins onns pli tard tuna el tut auter, sco quai che questa sequenza or da «Charlie und die Schokoladenfabrik» (USA, 2005) da Tim Burton mussa.
Per mussar il mund gotic ed extravagant dal reschissur Tim Burton gioga Johnny Depp en quest film cun in stil fitg expressiv e carichescha la mimica e gestica che Tim Burton, enconuschent per sia direcziun d'acturs fitg pretensiusa, al ha prescrit senza dubi.
En «Pirates of the Caribbean: Fluch der Karibik 2» (USA, 2006) da Gore Verbinsky persunifitgescha l'actur la rolla dal chapitani Jack Sparrow, in pirat cumplettamain balurd, sco quai che mussa la sequenza che suonda.
El ha sa laschà inspirar da las rollas extravagantas che Tim Burton al ha confidà ed ha creà sia atgna figura. Sco actur cun status da star po el sa lubir quai. El na sa lascha betg pli instruir dal reschissur – che ha franc gì da far pli che avunda al set durant las lavurs da filmar per quest blockbuster char. Il resultat: el exagerescha in pau e para affectà!
Las differentas sequenzas mussan damai che Johnny Depp ha creà en il decurs dal temp ina figura extravaganta – ina rolla caracteristica per el e la quala ils reschissurs ed ils films al impegnan oz gugent. Perquai sviluppa el strusch pli vinavant sia moda da giugar. Per sia fortuna al offran reschissurs mintgatant rollas pli ristgantas ch'ins numna lura rollas atipicas, sco per exempel en «Black Mass» (USA, 2015) da Scott Cooper, nua ch'el gioga in gangster senza scrupels.
En questa scena gioga Johnny Depp a moda main exagerada. Quai è in indizi ch'il reschissur al ha probablamain instruì vaira bain. El ha lavurà vi da sia vusch per sa schluitar en la rolla d'in malfatschent malizius, perfid ed extrem grop. Ins discurra d'ina rolla atipica, perquai ch'ella na correspunda betg a quellas, per las qualas Johnny Depp vegn tschernì normalmain. Perquai èsi impurtant che acturas ed acturs vegnan instruids da la reschia. Els han uschiglio la tendenza da repeter quai ch'els san gia far bain.
A las acturas ed als acturs en ils films dad Ursula Meier na pudess quai mai capitar, pertge che la reschissura s'engascha fitg per instruir ils acturs. Sias instrucziuns da reschia èn fitg exactas e pertutgan sentiments, gestica e moviment tuttina sco la posiziun en il local. Er al corp dals acturs dat Meier gronda impurtanza: co sa sentan els en lur figura, co dattan els vita ad ella? Ella sa era quant lunsch ch'ella dastga ir cun sias pretensiuns e tge cunfins ch'ella sto respectar.
En cumparegliaziun mainan autras reschissuras ed auters reschissurs mo minimalmain lur acturas ed acturs e laschan dapli spazi per l'improvisaziun. Questa avischinaziun po crear in clima da fidanza che lascha esser fitg creativ ils acturs e ch'als encuraschescha da contribuir lur atgnas ideas.
Quai è il cas tar il reschissur franzos Olivier Assayas che na fa naginas emprovas avant che filmar. Cura che las acturas ed ils acturs arrivan al set, dat el intginas instrucziuns generalas davart la scena che duai vegnir filmada ed als lascha lura agir a moda absolut libra davant la camera. Quai ves'ins bain en la sequenza che suonda or da «Die Wolken von Sils Maria» (Frantscha, 2014), nua ch'ins vesa ils stars da film Juliette Binoche e Kristen Stewart.
Cun questa tecnica che sa basa per part sin improvisaziun pon ins cuntanscher resultats fitg spontans. Sa chapescha che la medema scena vegn filmada pliras giadas ed il reschissur maina ses acturs mintga giada in zic pli datiers al resultat giavischà.
Tuttina sch'i vegn lavurà a moda autoritara u fitg libra, la direcziun d'acturs è ina part fitg impurtanta da la professiun da reschissur. La collavuraziun artistica dependa da la relaziun da la reschissura u dal reschissur cun mintga singul actur. Idealmain sa discuteschan las partidas per crear in'ovra da cuminanza.
La direcziun d'acturs influenzescha perquai fermamain la natira d'in film: per mintga quadrascha e per mintga scena dal film ston las acturas ed ils acturs survegnir las instrucziuns necessarias, per che lur figura sa cumportia tenor il script e tenor l'idea da la reschia.
- Davart Ursula Meier
-
Ursula Meier, reschissura e scenarista cun ragischs svizras e franzosas, ha studegià cinematografia a Brüssel. L'emprim ha ella fatg reschia da plirs films curts, e lur success a festivals l'ha dà il curaschi da cuntinuar cun sia carriera da film. Il 2002 ha ella fatg ses emprims films en lunghezza da film dramatic: «Weder Polizei noch Schwarz noch Weiss», in film documentar che descriva la midada surprendenta d'in policist genevrin, e «Die Sprinterin», in film dramatic che raquinta l'istorgia d'ina giuvna che vul daventar sportista d'elita.
Il 2008 ha ella fatg reschia da ses emprim film da kino «Home», ina preschentaziun perturbanta d'ina famiglia disfuncziunala che viva a l'ur d'ina autostrada en construcziun. Cun «Winterdieb» ha ella filmà il 2012 in'istorgia impressiunanta davart l'inegualitad sociala e la mancanza d'amur, cun la quala ella ha gudagnà in «urs d'argient» al festival da film internaziunal a Berlin.
Cun quests dus films ha cumenzà era la carriera d'actur da Kacey Mottet Klein, ed els demonstreschan il talent da la reschissura per la direcziun d'acturs. Il 2016 ha Ursula Meier survegnì il Premi dal film svizzer per il meglier film curt per la Kleine Kinoschule «Kacey Mottet Klein, Anfänge eines Schauspielers».
